Şirinov Mənsur Ceyhun oğlu 1967-ci il yanvarın 5-də Laçın rayonunda anadan olub. Uşaqlıq və gənclik illərini doğma yurdunda keçirən Mənsur, sonradan həyat yolunu hərb sənəti ilə bağlayıb. O, hərbi xidmətini başa vurduqdan sonra bir müddət xaricdə – Almaniyanın Grimma şəhərində hərbi məktəbdə təhsil almış, burada həm oxumuş, həm də xidmət göstərmişdir. Baş leytenant rütbəsinə yüksələn Mənsur 1989-cu ildə Azərbaycana qayıdır və ailə həyatı qurur.
Lakin həyatın axarı onu yenidən doğma torpaqlarına bağlayır. 1990-cı illərin əvvəllərində baş verən ağır hadisələr, xüsusilə 20 Yanvar faciəsi və ölkədəki gərgin vəziyyət onun həyatında dönüş nöqtəsinə çevrilir. O dövrdə xaricdə yaşayan Mənsur, baş verənləri ilk dəfə qəzetlər vasitəsilə öyrənir və vətənə qayıtmaq qərarını qəti şəkildə qəbul edir.
Azərbaycana döndükdən sonra o, Hacı Zeynalabdin Tağıyev qəsəbəsində, “Nasosnu” adlanan ərazidə yerləşən 888 saylı hərbi hissədə xidmətə başlayır. Müharibə alovlandıqca Mənsur könüllü olaraq cəbhəyə yollanır. Ailəsinin narazılığına baxmayaraq, o, “mən bu rütbəni və təhsili vətənim üçün qazanmışam” deyərək ön xəttə gedir və döyüşlərdə fəal iştirak edir.
Döyüşlər zamanı göstərdiyi igidlik və şücaət sayəsində bir neçə dəfə fəxri adlara layiq görülür. O, yalnız komandir kimi deyil, həm də əsgərlərinə dayaq olan, onları qoruyan bir lider kimi yadda qalır. Döyüş meydanında cəsarəti ilə seçilən Mənsur, bir çox əsgərin həyatını xilas edir və onların geri çəkilməsinə imkan vermir.
Şəhidimiz həmçinin hərbi nizam-intizamı və əsgərlərə olan qayğısı ilə seçilirdi. Onun rəhbərliyi altında əsgərlər arasında nizam-intizam qorunur, döyüş ruhu yüksək saxlanılırdı. O, həm peşəkar hərbçi, həm də əsl vətənpərvər kimi tanınırdı.
1994-cü il martın 22-də, 93–94-cü illərin ən ağır döyüşlərindən birində Mənsur Şirinov qəhrəmancasına şəhid olur. O, döyüş meydanında 16 əsgəri ilə birlikdə şəhidlik zirvəsinə ucalır. Onun cənazəsi Bakıdakı II Fəxri Xiyabanda torpağa tapşırılıb və bu gün də xatirəsi ehtiramla yad olunur. Qeyd edək ki, Mənsur şəhid olduqdan 18 gün sonra qızı dünyaya gəlir.
Mənsur Ceyhun oğlu təkcə bir döyüşçü deyil, həm də vətənə sədaqətin, qətiyyətin və igidliyin rəmzidir. Onun həyatı bizə göstərir ki, əsl qəhrəmanlıq sözlə deyil, əməl ilə yazılır.
