Paytaxtda fəaliyyət göstərən və son illərdə tez-tez müzakirələrə səbəb olan “MedAura” klinikası artıq əvvəlki adı ilə fəaliyyət göstərmir.
Xüsusi.Tv xəbər verir ki, klinika bundan sonra “28 Medical Center” adı ilə fəaliyyətini davam etdirəcək. Məlumata görə, tibb müəssisəsinin ünvanı dəyişməsə də, brend tamamilə yenilənib və əvvəlki adla fəaliyyət göstərən sosial media hesabları da bağlanıb.
Diqqətçəkən məqam isə ondan ibarətdir ki, klinikanın yeni adı ilə yanaşı, bütün sosial şəbəkə səhifələri də sıfırdan formalaşdırılıb. Bu isə ictimaiyyətdə müxtəlif suallar doğurur.
Xatırladaq ki, “MedAura” klinikası son dövrlərdə sosial şəbəkələrdə pasiyent şikayətləri ilə tez-tez gündəmə gəlirdi. Müxtəlif iddialar, narazılıqlar və mübahisəli xidmətlər klinikanın reputasiyasına ciddi təsir etmişdi.
İndi isə əsas sual budur: adın dəyişdirilməsi problemlərin həlli deməkdir, yoxsa sadəcə diqqəti yayındırmaq cəhdi?
Ekspertlər bildirir ki, tibb müəssisələrinin ad dəyişməsi normal praktika sayılsa da, əgər bu addım əvvəlki problemlər və şikayətlərin fonunda atılırsa, bu zaman məsələ daha ciddi yanaşma tələb edir. Çünki söhbət birbaşa insan sağlamlığından gedir.
Müşahidəçilərin fikrincə:
- əvvəlki şikayətlərə hüquqi qiymət verilibmi?
- pasiyentlərin iddiaları araşdırılıbmı?
- yeni brend altında eyni problemlər təkrarlanmayacaqmı?
kimi suallar hələ də cavabsız qalır.
Hazırda klinika tərəfindən bu dəyişikliklə bağlı geniş izah verilməyib. Rəsmi mövqenin olmaması isə narahatlığı daha da artırır.
Məsələ ilə bağlı aidiyyəti qurumların mövqeyi və mümkün araşdırmaların nəticələri ictimaiyyət tərəfindən diqqətlə izlənilir.
