Bu gün Aprel döyüşlərinin başlamasından 10 il ötür. 2016-cı ilin aprel ayında baş verən bu hadisələr Azərbaycan tarixində mühüm dönüş nöqtələrindən biri kimi yadda qalıb.
Xüsusi.Tv xəbər verir ki, 2016-cı il aprelin 1-dən 2-nə keçən gecə Azərbaycan Ordusu Ermənistan silahlı qüvvələrinin cəbhə xəttində törətdiyi təxribatlara cavab olaraq genişmiqyaslı əks-hücum əməliyyatına başlayıb.
Qısa müddət ərzində həyata keçirilən uğurlu hərbi əməliyyat nəticəsində düşmən qüvvələri ciddi itkilərə məruz qalıb və strateji yüksəkliklər Azərbaycan Ordusunun nəzarətinə keçib. Bu döyüşlər zamanı xüsusilə Lələtəpə yüksəkliyinin azad edilməsi hərbi baxımdan mühüm üstünlük qazandırıb.
Aprel döyüşləri bir daha göstərdi ki, Azərbaycan Ordusu müasir silahlanma, yüksək döyüş ruhu və peşəkar hazırlıq baxımından regionun ən güclü ordularından biridir. Bu qələbə həm cəbhə xəttində, həm də cəmiyyət daxilində böyük ruh yüksəkliyi yaratdı.
Hərbi ekspertlər qeyd edirlər ki, Aprel döyüşləri sonradan baş verən və İkinci Qarabağ müharibəsi kimi tarixə düşən 44 günlük Vətən müharibəsinin başlanğıc nöqtəsi oldu. 2016-cı ildə əldə olunan təcrübə və qazanılan üstünlüklər 2020-ci ildə tam qələbəyə gedən yolun əsasını təşkil etdi.
Bu döyüşlər zamanı Azərbaycan əsgərləri qəhrəmanlıq nümunələri göstərərək şəhidlik zirvəsinə ucaldılar. Onların xatirəsi hər zaman ehtiramla yad olunur.
Aprel döyüşləri yalnız hərbi uğur deyil, həm də Azərbaycan xalqının birliyinin, dövlətinə və ordusuna olan inamının göstəricisi kimi tarixdə qalır.
